Budyski wokrjes chce w lětomaj 2019 a 2020 inwesticije za nimale 180 milionow eurow zeskutkownić. Ćežišćo w kubłanskim wobłuku je modernizacija šulskeho stejnišća Kamjenc. Tež zarunanski nowotwar za Bartsku wyšu šulu ze sportownju a rozšěrjenje Kinsporskeje Wyšeje šule stej w dwójnym etaće wokrjesa zakótwjenej.
Budyšin (SN/at). Bjezdwěla su inwesticije do šěrokopasmoweho wutwara w nimale wšitkich komunach najwjetša suma w dwójnym etaće 2019/2020 Budyskeho wokrjesa. 105 milionow eurow maja wotpowědne dźěła płaćić, z kotrymiž su nazymu započeli a kotrež dyrbja za dwě lěće wotzamknjene być.
Wokrjesny radźićel a Malešanski wjesnjanosta Matthias Seidel (CDU) je spokojom. Česćelakomy projekt, w Barće dwučarowe wyšošulske stejnišćo w nošerstwje wokrjesa wutworić, „je so do prawych kolijow dóstał“. Za nowu sportownju chcedźa srědki sakskeho komunalneho paketa „polěpšenje šulskeje infrastruktury“ wužiwać. Dwójny etat wokrjesa předwidźi za to nimale 4,5 milionow eurow. Sportownja ma 2021, šula lěto pozdźišo dotwarjena być.