Bóšicy (MŠm/SN). W Bóščanskej gmejnje su wobydlerjo lěto 2019 na wosebite wašnje witali. Dobreho wothłosa minjeneho lěta dla přeprosy wjesnjanosta Stanij Ryćer (Bóščanske rjemjesło) na druhe hwězdne pućowanje. Wobdźělnicy podachu so ze štyrjoch městnow na pućowanske čary, kotrež běchu stajnje štyri do pjeć kilometrow dołhe. Tak nóžkowaše 150 ludźi z Jaseńcy, Bóšic, Wětrowa a z Hory do Noweje Jaseńcy.
Na pućowanskej čarje dyrbjachu wobdźělnicy kedźbować, dokelž měješe wjesnjanosta na kóncu mały kwis spřihotowany. Kóžda pućowanska čara wjedźeše nimo wosebiteho kamjenja, tak mjenowaneho Kralowsko-sakskeho triangulaciskeho dypka. Kamjeń steji při pólnym pućiku pola Hory. Je to jedyn z cyłkownje 125 tajkich dypkow w swobodnym staće. Dohromady bě jich w Sakskej raz 158 stacijow. Kralowsko-sakski triangulaciski dypk pola Hory eksistuje wot oktobra 1865.
Cil hwězdneho pućowanja bě nowe hrajkanišćo z hětu w Nowej Jaseńcy. Tam čakachu na wšitkich wobdźělnikow horce wino, dźěćacy punš kaž tohorunja pražena kołbaska z całtu.