Halštrow (SN/MWj). Runje před 25 lětami je Halštrowska Hollandec hornčernja prěni dworowy swjedźeń přewjedła. Tehdy zhladowachu na 250lětne wobstaće swójbneho předewzaća. Štwórć lětstotka pozdźišo hotuja so na přichodny „kulojty“ jubilej. Dworowych swjedźenjow je Hans Holland w tym času tójšto organizował, ale tón k 275. róčnicy zawoda je žno něšto wosebiteho. Što pak je jeho potajnstwo, zo jako hornčer tak dołho wobsteji? „Najwažniše je, zo sy hornčer z ćěłom a dušu. Wězo njesměš so kónctydźenskeho dźěła bojeć, hdyž sy wot jutrow hač do nazymy stajnje na najwšelakorišich wikach po puću“, Hans Holland wuswětla. Jeho wosebitosć je, zo ze swojimaj sobudźěłaćerkomaj lědma wuměłske wěcy zhotowja, ale hłownje sudobja, kotrež móžeš w domjacnosći trjebać a wužiwać. A te hodźa so do pjecy runje tak kaž do mikrožołmaka abo wopłokowanskeje mašiny.