Něhdy bě w nimale kóždej wsy nakupowanišćo, hdźež poskićachu twory wšědneje potrjeby. Runočasnje běchu to socialne centrumy, hdźež so wjesnjenjo rady k bjesadźe zetkawachu. W našej lětnjej seriji na něhdyše wjesne wobchody dopominamy.
Dźensa: Miłoćicy (9)
W Miłoćicach z jeho něhdźe 200 wobydlerjemi mějachu hižo 1926 mały wobchod z kolonialnymi tworami. Nimo tworow za wšědnu potrjebu běštej w Šěrakec domje tež póst a wjesna korčma, hdźež měješe hač do 20 wosobow městno. Hana Šěrakowa posłužowaše kupcow hač do lěta 1967, a činješe to hač do poslednjeho dnja w narodnej drasće. Jeje syn Beno załoži sej małe transportne předewzaće a wožeše spočatnje filmowu techniku, zo móhli sej ludźo na wsach filmy wobhladać. Hač do 1987 wobstarowaše jeho mandźelska Marja póstowe naležnosće za wjesnjanow. 20 lět do toho pak bě Hana Šěrakowa wobchodźik zawrěła. Konsum na to dalše zastaranje přewza a je přechodnje pola Alberta Delenczka mału předawarnju zarjadował.