Něhdy bě w nimale kóždej wsy nakupowanišćo, hdźež poskićachu twory wšědneje potrjeby. Runočasnje běchu to socialne centrumy, hdźež so wjesnjenjo rady k bjesadźe zetkawachu. W našej lětnjej seriji na něhdyše wjesne wobchody dopominamy.
Dźensa: Njebjelčicy (18)
Před wjace hač sto lětami je ze Šunowa pochadźacy Herman Kubaš w Njebjelčicach na horje napřećo cyrkwi ležownosć kupił. Po powołanju bě blidar a swoje pólko je z kruwu wobdźěłał. Jeho ideju, zarjadować sej klamarstwo z tworami wšědneje potrjeby Njebjelčenjo jara witachu a su je hač do lěta 1997 wužiwali. W korčmičce, kotruž bě Kubaš hižo do toho zarjadował, dźensa hišće jeho wnučk Alojs Deleńk póndźelu wječor, njedźelu po kemšach kaž tež po dorěčenju piwo toči.
