Gmejna měła 2 000 eurow připłaćić

póndźela, 16. septembera 2019
artikl hódnoćić
(0 )

Trjebin (CK/SN/mwe). W Trjebinje su z pjenjezami něhdyšeho wuhloweho koncerna Vattenfall towarstwowy dom natwarili. Wot lěta 2012 wobhospodarja jón Sportowe towarstwo Fortuna, kotrež Choćebuski prawiznik Holger Scharmach zastupuje. Wón je fachowc zarjadniskeho prawa.

Nětko je ST Fortuna we wuskosćach a ma pjenježne problemy. Jako přičinu mjenuje jeho předsyda René Kraink, zo njejsu přilubjene financy po dojednanju z Trjebinskeho zrěčenja prawidłownje dochadźeli. Čłonow towarstwa kaž tež jeho partnerow boli, zo Trjebinski wjesnjanosta Waldemar Locke (CDU) cyłkej insolwencu wumjetuje. Tak je wón njedawne posedźenje gmejnskeje rady přetorhnył a radźićelow domoj pósłał.­ Serbske Nowiny wo tym rozprawjachu.

Fakt je, zo so Trjebinske ST Fortuna jenož wo wobhospodarjenje domu towarstwow njestara, ale tež trening zawěsća a wšitkim starobnym klasam móžnosće sportowanja poskića. To jedne a to tamne, to rěka sport a wobhospodarjenje domu, pak je po knihowanju kruće dźělene. Město přilubjenych 250 000 eurow z Trjebinskeho zrěčenja wob lěto dóstawa towarstwo wot lětušeho měsačnje jenož hišće 12 000 eurow. To za wudźeržowanje domu a za personal prědku a zady njedosaha. Prawiznik Holger Scharmach sej žada, zo ma gmejna Trjebin měsačnu diferencu 2 000 eurow wot 1. januara wróćo sahajo připłaćić. To by sportowemu towarstwu hižo pomhało. „Jeli gmejna njereaguje, wostanje jenož sudniska skóržba“, Scharmach wuswětla.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND