Lětsa bě to mjeztym dźesaty raz, zo wuhotowa Koćinski zawod Krabatowy mlokowy swět na iniciatiwu jednaćela Tobiasa Kockerta žnjowy dźakny swjedźeń.
Koćina (aha/SN). Kaž minjene lěta dźeń do Kulowskeje kermuše, zahajichu tež tónraz swjedźeń z požohnowanjom płodow, a to tónkróć z kapłanom Adamom Kaźmierskim. Młody pólski duchowny před wulkej syłu přitomnych pokaza serbsce a němsce na politiske a hospodarske napjatosće a wuzběhny, „zo mamy so Bohu dźakować za dobre a wunošne žně“. Za to so serbsce a němsce pomodlichu. Dźiwajo na wjele serbskich wopytowarjow, jich organizatorojo kermušnych wikow tež z napisom w jich maćeršćinje witachu. Něhdźe 50 wikowarjow z cyłeje Sakskeje kaž tež wjacori ze susodneje Braniborskeje poskićowaše najwšelakoriše wudźěłki. Jich paleta sahaše wot wołmjanych nohajcow přez eteriske wolije hač k zubnej pasće z hojenskich rostlin. Jara požadane běchu wudźěłki z hojenskeje rostliny canabis, najstaršeje wužitneje přećiwo wjacorym chorosćam.
