Zwjazk za wopłóčki Při Klóšterskej wodźe naćisk etata wupołožił

Wudwor (AK/SN). 2020 budźe za wopłóčkowy zwjazk Při Klóšterskej wodźe (AZV) lěto mnohich nowosćow a dalšich nadawkow. Klětuši hospodarski plan je hižo na to wusměrjeny. Tak ma so zwjazk Kamjenskemu zaměrowemu zwjazkej za pitnu wodu přizamknyć. Wot klětušeho móhł tuž tamniši zastaraćel z energiju a wodu Ewag wšitke zawodne wobstarowanja přewzać. „To sej čłonske gmejny přeja“, podšmórnje Jan Mikel, tuchwilu amtěrowacy jednaćel AZV, a pokazuje na protokolowu noticu njezjawneho wuradźowanja zwjazkoweje zhromadźizny ze 24. septembra. „To pak je hišće dołhi puć. Za to dyrbimy tójšto prašenjow rozrisać a wobzamknyć.“