Štó a što tči za serbskimi projektami, kotrež buchu we wobłuku wubědźowanja Sakskeho fondsa „Čiń sobu!“ mytowane? W lětušim serialu Serbskich Nowin je předstajamy.
Rěč sobu! Aktualnych temow je dosć, problemow drje tež a hišće wjace prašenjow, kak móhli je jako jednotliwcy rozrisać, abo móhli to docyła. Potrjeby rěčeć, so aktiwnje rozestajeć, su njeličomne. Přemało je druhdy konkretnych wužadanjow, to tež činić. W hrajnej dobje 2019/2020 Němsko-Serbskeho ludoweho dźiwadła Budyšin přewjedu nowy format pod hesłom RĚČsobu!, kotryž wěnuje so hłownje temam wobswět, fastfashion, smartphone a demokratija. Přez cyłe lěto maja so mjeńše zarjadowanja wotměć. A to nic kaž zwučene w dźiwadle, ale tam, hdźež so młodostni zetkawaja. Madleńka Šołćic je projekt lětsa za wubědźowanje Sakskeho fondsa „Čiń sobu!“ zapodała. Jako zastupjerka intendanta za serbske dźiwadło NSLDź pyta wona nowy přistup k młodźinje, chce so jeje temam bližić, temy poskićeć a so zdobom temam wotewrěć, kotrež móhli tež inspiracija za inscenaciju serbskeho profesionalneho dźiwadła być.