Łaz (AK/SN). Po wjac hač jednym lěće saněrowanja hotuje so ewangelska cyrkej we Łazu na znowaposwjećenje swojich pišćelow. Instrument je produkt twornje Ladegast-Rühlmann z lěta 1872, kaž čłon Łazowskeje wosadneje rady Günter Wjenk potwjerdźi.

Tuchwilu zatwarjataj sobudźěłaćerjej Budyskeje pišćeletwarskeje firmy Eule Friedemann Birke a Lukas Neumann techniku do instrumenta. Po tym mataj dalšej kolegaj pišćałki do njeho zatwarić a je hłosować. „Łazowske pišćele restawrować je chětro naročne“, rozłoži pišćeletwarc Friedemann Birke. „Chcemy wšak poprawnu techniku w dalokej měrje zachować. Wuměnjamy tuž jenož dodźeržane dźěle.“ Wjacore dźěle pedalowych tastow su hižo wuměnili. Na tak mjenowanym „hrajnym blidźe“ su tohorunja furněry ponowili. Sobu najćeši a najnaročniši krok bě, tak mjenowane powětrowe wokeńcy (Windladen) natwarić. Te dyrbjachu w Budyskim zawodźe Eule wobnowić. Nimo toho mějachu we Łazu tójšto detailowych dźěłow zmištrować. Dźěle mechaniki pišćelow su to­horunja wobnowili. Znowa zadźěłali su měchawu.