Móža swójski podźěl pomjeńšić

pjatk, 20. decembera 2019
artikl hódnoćić
(0 )
Nawoda Konječansko-Šunowskeje wohnjoweje wobory a čłon Ralbičansko-Róžeńčanskeje gmejnskeje rady Sylwijo Čórlich (srjedźa) je delanskim gmejnskim radźićelam nowe jězdźidło pokazał a někotre techniske rafinesy rozłožił.  Foto: Janek Wowčer Nawoda Konječansko-Šunowskeje wohnjoweje wobory a čłon Ralbičansko-Róžeńčanskeje gmejnskeje rady Sylwijo Čórlich (srjedźa) je delanskim gmejnskim radźićelam nowe jězdźidło pokazał a někotre techniske rafinesy rozłožił. Foto: Janek Wowčer

Njewočakowany wulki dar za nowy lift w Ralbičanskej šuli

Ralbicy (SN/JaW). Takrjec swoju wosobinsku hodownu stawiznu we woprawdźitym zmysle słowa je wčera gmejnska rada Ralbic-Róžanta dožiwiła. A to hnydom dwójce. Na swojim wuradźowanju w Ralbičanskej starej šuli móžachu wjacore dary k zarunanju kóštow zatwara šulskeho lifta přiwzać. Kaž zastupowacy wjesnjanosta Michał Šołta (SWZ Delany), kotryž zhromadźiznu nawjedowaše – wjesnjanosta Hubertus Ryćer (CDU) je na dowolu –, zwurazni, jedna so wo cyłkownu sumu nimale 8 300 eurow, kotruž su Ralbičanscy šulerjo na swójsku iniciatiwu nazběrali. Prěni raz wotměchu tam mjenujcy „běh z wutrobu“. „Wučerjo běchu mysličku zrodźili a so šulerjow prašeli, što k tomu měnja. Kaž direktorka Milenka Koberowa w rozmołwje rjekny, su wšitcy hnydom za to byli a sej sponsorow w swójbje a mjez přiwuznymi pytali, kotřiž jim na běžane stadionowe koło wěsty obolus płaća“, Šołta rozłoži.

Běh su minjeny měsac přewjedli, a wuslědk je wulka suma pjenjez, kotrež su wčera w formje lisćiny přiwzali ze zaměrom, swójski podźěl gmejny za zatwar lifta pomjeńšić. Kóždy šuler je tak něšto za dalšeho šulerja činił, ale tež za swójsku strowotu a za socialnu kompetencu“, měnješe Michał Šołta. Wón wupraji šulerkam a šulerjam kaž tež wučerjam – mnozy z nich běchu tohorunja jako sponsorojo běharjow podpěrali – dźak a wulki respekt za akciju. Tak móže gmejna swójski podźěl wjacorych dźesać tysac eurow wo tójšto pomjeńšić, štož radźićelow jara zwjesela.

Dalši dypk, kotryž móhli jako hodownu stawiznu zapisać, je tón, zo dóstachu wohnjowi wobornicy Konjec-Šunowa wčera – potajkim dypkownje k wobradźenju – swoje nowe woborne awto. Hakle­ popołdnju běchu je wotewzali a wječor přijědźechu z nim do Ralbic na gmejnsku radu, zo bychu jeje radźićelam­ jězdźidło, kotrež je cyłkownje něhdźe 120 000 eurow płaćiło, před­stajili. Nawoda Konječansko-Šunowskeje wohnjoweje wobory Sylwijo Čórlich zwurazni dźak, zo je komuna do přichoda tamnišeje wobory kaž tež do wohnjoškita na wsach inwestowała a za to hobersku sumu pjenjez nałožiła.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND