Štyrjo škotowarjo prěnjeje hodźiny su hišće dźensa pódla, hdyž zarjaduja w Nowej Wjesce swój škot wo myta mjez hodami a Nowym lětom. Zajimawosć tónraz bě, zo bu chětro wjele hrow přěhratych.
Nowa Wjeska (ddy/SN). Kaž kóžde lěto mjez hodami a Nowym lětom zarjadowachu Nowowješćenjo zaso swój škotowy turněr. Za štyrjomi blidami je cyłkownje šěsnaće hrajerjow karty placało. A woni njeběchu jeno ze wsy a wokoliny do Nowowješćanskeho młodźinskeho kluba přichwatali. Samo z Radworja a Kulowa, kaž farar Gabriš Nawka, běchu škotowarjo přeprošenje sćěhowali.
Hižo w prěnim kole so pokaza, zo wutwori so jasne koło faworitow, mjeztym zo někotryžkuli ze starych zajacow podarmo za grandom honješe. Najlěpša a zdobom jenička žona bě Kira Hrjehorjec, kotraž praji: „Sym nětko hižo někotre lěta z přećelemi a znatymi tu pódla. A móžu přeco hišće něšto nowe přinawuknyć. To čini tutu hru tak zajimawu za mnje. Nimam žadyn strach, so z mužemi měrić.“