Serbska literatura słuša do kruteho wobstatka wupožčowarnje
Łaz (AK/SN).) „Čitanje posrědkuje zbožo a wjeselo. Wone zmóžnja mysle zběrać a je dobra zaběra we wólnym času. Čitać tež rěka so kubłać. Jako dźěl zjawneje infrastruktury ma biblioteka klučowu funkciju a njeda so pódhodnoćić“, podšmórnje Grit Pelzer, sobudźěłaćerka gmejnskeje biblioteki Łaz w tamnišim Domje Zejlerja a Smolerja.
Loni je 326 stajnych čitarjow poskitki knihownje wužiwało. W cyłku mějachu 3 337 wopytowarjow ze wšěch wjesnych dźělow gmejny kaž tež z Wujězda nad Sprjewju a Wojerec. 25 procentow čitarjow su dźěći hač do dwanaće lět, 20 proc. su młodostni do 25 lět, 30 proc. su 30- do 60lětni a 25 proc. starši hač 60 lět.