Maja ducha Kulowskich póstniskich norow w kreji
Kulow (SN/BŠe). Město a wsy hromadźe słušeja, to staj sej lětuši Kulowski princowski por Oliver a Mandy Brösanec z delnich Sulšec předewzałoj, štož bě tež na wčerawšim póstniskim ćahu widźeć. Wjac hač 10 000 ludźi je sej jón wobhladało. Zo je princowski por – mostytwarc – lětsa ze Sulšec, bě zdobom tema wjacorych wozow. Hordźi wjesnjenjo tuž namjetowachu: „Chceš-li raz princesna być, dyrbiš mandźelskeho ze Sulšec měć.“
Napadnyło je, zo běchu sej wozytwarcy zaso hłowu łamali a rafinesy wumyslili. Młodostni z Koblic natwarichu sej Zwingerowy ekspres, z kotrymž jědźechu po debjenki do Drježdźan. Wjele kedźbnosće wuwabi tež spaceshuttle z Kulowca. Z nim chcychu so pasažěrojo hrožaceje klimoweje změny dla do druheho kosmosa podać. Temy klima, brunica, přewjele wuhlikoweho dioksida abo hibanje wokoło aktiwistki Grety Thunberg wuhladachu ludźo hnydom na wjacorych wozach, mjez druhim tež na Dubrjenskim.