Dołho na to čakali

pjatk, 06. měrca 2020
artikl hódnoćić
(0 )
Delanscy starši a ći z Kulowskich kónčin su po wčerawšim wuznaću gmejnskeje rada Ralbicy-Róžant k Ralbičanskej šuli znajmjeńša trochu wolóženi. To bě mój zaćišć, jako jich wčera po wuradźowanju rady zetkach. Runje nětkole je wažne, zo dóstawaja starši wšu móžnu podpěru a zo w boju wo swoje předewzaće njepopušća. Na tónle signal njejsu jenož woni, ale wša zjawnosć dołho čakali! Bě woprawdźe načasu, zo je skónčnje k tomu dóšło. Trochu wšak so přiwšěm dźiwam, mjenujcy, zo započina gmejna hakle nětko argumenty zběrać, zo móhli w přichodnym 5. lětniku dwě rjadowni wutworić. Problem dźě njeje hakle wot wčerawšeho znaty a starši běchu so hižo w januarje na wjesnjanostu wobroćili. Radšo pak pozdźe, hač scyła nic! Fakt je, zo steja gmejnscy radźićeljo a wjesnjanosta za staršimi a wuprajeja so tež za wutworjenje dweju rjadownjow 5. lětnika we Worklecach. A to je za mnje jasny signal do přichoda. Janek Wowčer

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND