„Sherlock Holmes“ so přizjewja

pjatk, 03. apryla 2020
artikl hódnoćić
(0 )

Němsko-Serbske ludowe dźiwadło hotuje so na lětnju sezonu. Za 25. Budyske dźiwadłowe lěćo budu zastupne lisćiki wot 4. apryla na předań. Skazać pak móža sej je zajimcy jeničce online abo telefonisce.

Budyšin (SN). Tradicionelnje zahaji Budyske NSLDź swoju lětušu předawansku sezonu za lětnje dźiwadło „Sherlock Holmes“ a to 4. apryla, dypkownje w 11 hodź. Cyle po tradiciji wšak to njebudźe, prěni króć mjenujcy wotměje so wšitko bjez publikuma. Přiwšěm so sobudźěłaćerjo dźiwadła nadźijeja, zo mnozy zajimcy akciju live w interneće sćěhuja, mjez druhim na stronje www.theater-bautzen.de. Wot 10.45 hodź. móža woni wšitko sćěhować. Tež Sherlock Holmes (Richard Koppermann) und Dr. Watson (Měrko Brankačk) budźetaj pódla a mataj někotružkuli překwapjenku přihotowanu. Po wutřělu z kanony NSLDź potom kartki online pod www.theater-bautzen.de a telefonisce pod čisłom 03591/584 225 předawa kaž tež rezerwuje. Kasa njeje tuchwilu powšitkownych postajenjow Sakskeje za wobmjezowanje koronawirusa dla wotewrjena.

Wot 25. junija, to ma premjera być, hač do 2. awgusta planuja na Budyskim hrodźe 35 předstajenjow inscenacije z titlom „SHERLOCK HOLMES – Die Beatles-Bänder + Das Biest von Bautzen“ w režiji intendanta NSLDź Lutza Hillmanna po motiwach Arthura Conana Doyla. Z Londonskeje Baker Street 221 B mišterski detektiw Sherlock Holmes a jeho partner dr. Watson wuslědźitaj, što je z mysterioznym klubom čerwjenowłosatych a štó je nahrawanja legendarneho poslednjeho wustupa Beatlesow, tak mjenowany rooftop-koncert 30. januara 1969 pokradnył. Wosebje napjate budźe, hdyž staj protagonistaj něšto lět pozdźišo w Hornjej Łužicy, hdźež slědźitaj za tym, kotre njeskutki tam Budyske zwěrisko zawinuje.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND