Do busa jeno ze škitom

štwórtk, 23. apryla 2020
artikl hódnoćić
(0 )
Štóž chce z busom sobu jěć, trjeba wot spočatka tohole tydźenja škit za hubu a nós.  Foto: SN/Hanka Šěnec Štóž chce z busom sobu jěć, trjeba wot spočatka tohole tydźenja škit za hubu a nós. Foto: SN/Hanka Šěnec

Koronowa pandemija je dawno wšitke wobłuki zjawneho žiwjenja docpěła. Tež busy zjawneho bliskowobchada, kotrež wot spočatka tydźenja zaso po normalnym planje za šulski čas jězdźa, njejsu wuzamknjene.

Budyšin (SN/MWj). Wot póndźele tohole tydźenja płaći w Sakskej winowatosć, zo maš při wužiwanju zjawneho bliskowobchada měć škit před nosom a hubu. Kaž Budyski krajnoradny zarjad zdźěli, apeluja na swójsku zamołwitosć sobujěducych, tajki škit wužiwać a trěbny wotstawk k tamnym sobujěducym dodźeržeć. Dale krajnoradny zarjad informuje, zo smědźa sobujěducych na to skedźbnić, tajke škitne wodźěće wužiwać. Štóž to nječini, tomu smě busowy šofer sobujězbu zapowědźić.

Woprawnjene wšak je prašenje, čeho­dla wodźer busa žadyn tajki škit za hubu a nós njetrjeba. W zdźělence krajnoradneho zarjad k tomu rěka, zo je šoferam hladajo na wěstotne žadanja při wodźenju busa w zwisku z wosebitymi rjadowanjemi wokoło koronawirusa přewostajene, hač sej nós a hubu wodźěja abo nic. Strowotne wuskutki za wodźerja a wěstota w nadróžnym wobchadźe steja při tym na prěnim městnje. Sakske ministerstwo za hospodarstwo a dźěło je wobchadnym zwjazkam zdźěliło, zo njewoznamjenja tajke wodźěće přeńdźenje přećiwo zakazej wo zakuklenju (§ 23 wotr. 4 StVO). Tuž je tež kóždemu šoferej přewostajene, sej nós a hubu z masku škitać.

Hinak wšak je, hdyž w busach jězdźenki předawaja. W tym padźe dyrbi tež šofer škitnu masku měć. Přidatnje podpěrać pak móhli jeho sobujěducy z tym, zo maja wotličene pjenjezy hižo spřihotowane, zo njeby k njetrjebawšemu kontaktej mjez nimi a busowym šoferom dóšło. Dalše naprawy desinfekcije dyrbja wobchadne předewzaća w swójskej zamołwitosći zwoprawdźić.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND