Gmejnje wudawki njenastanu

pjatk, 24. apryla 2020
artikl hódnoćić
(0 )

Dalši krok za nowy towarstwowy dom při Hórnikečanskim jězoru

Łaz (AK/SN). Towarstwowe žiwjenje při Hórnikečanskim jězoru ma so po woli Łazowskeje gmejnskeje rady zaso wožiwić. Sobu najwažniša naprawa za to budźe nowy towarstwowy centrum. Za jeho přizamknjenje z pitnej wodu wotzamknje gmejna zrěčenje z Kamjenskim za­wodom Ewag. Kaž wjesnjanosta Thomas ­Leberecht (CDU) na zašłym posedźenju radźićelow rjekny, słušeja Koblicy a Wulke Ždźary sobu do přisłušneho teritorija Kamjenskeho zastaraćela. Projekt budźe po 85 procentach spěchowany. Zbywace 15 procentow přewozmje Ewag, štož wučinja 26 000 eurow. Tule sumu gmejna najprjedy zapłaći, dóstanje pak ju poz­dźišo wot Ewag wróćenu. „Tak gmejnje žanežkuli wudawki njenastanu“, wjesnjanosta podšmórny.

Hórnikečanski jězor měli wot lěta 2022 zaso wužiwać móc. To je dale zaměr Łužiskeje a srjedźoněmskeje towaršnosće hórnistwoweho zarjadnistwa, kaž bě jeje wotrjadnik Karsten Handro hižo loni w decembru wuzběhnył. Na wuchodnym pobrjohu na Kobličanskej stronje budu tež po tym hišće wšelake dźěła trěbne. Za to chcedźa předewšěm zymske mě­sa­cy wužiwać, hdyž ludźo jězor tak jara njewužiwaja. Předwidźane je to hač do lěta 2025. Hakle potom budźe Hórnikečanski jězor doskónčnje saněrowany.

Najprjedy raz přesunjeny je dźeń wote­wrjeneho twarnišća. Tón chcedźa po słowach Thomasa Leberechta nazymu nachwatać.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND