Město změje „hoberski problem“

štwórtk, 30. apryla 2020
artikl hódnoćić
(0 )

Koronapandemije dla schadźowaše so Budyska měšćanska rada wčera w Melanchthonowym gymnaziju. Tamniša wjacezaměrowa rumnosć pak je so jako njekmana za tajke zarjadowanja wopokazała, předewšěm swojeje špatneje akustiki dla.

Budyšin (CS/SN). Pjenježne wuskutki koronakrizy na sprjewine město běchu jedna z hłownych temow na wčerawšim posedźenju Budyskeje měšćanskeje rady a wuwabichu wobšěrnu diskusiju. Financny měšćanosta dr. Robert Böhmer pokaza na přewšo chutne połoženje. Runočasnje pak wón rjekny, zo njemóže město problemy rozrisać, za kotrejž stej wokrjes a Swobodny stat Sakska zamołwitej. Hdyž dalše dawkowe dochody wotpadnu, změje město Budyšin „hoberski problem“. „Na kóždy pad płaći zasada, zo njemóžemy pjenjezy wudawać, kotrež tu njejsu“, Böhmer podšmórny.

Wot spočatka krizy koronawirusa dla ma sprjewine město 1,2 milionaj eurow mjenje dochodow z přemysłoweho dawka, hač je planowało. Jeničce wupad dochodow ze zabawjenskeho dawka w hrajnych halach wučinja deficit 80 000 eurow. K tomu přińdu wotpadnjene staršiske přinoški a wužiwanske popłatki. ­„Někajke přechwatane rozsudy pak nam ničo njepřinjesu“, Robert Böhmer wu­zběhny. Wšako dyrbja při wšej krizy dale prawniske předpisy wobkedźbować. „Dyrbimy to najlěpše z toho činić, byrnjež měli wulku horu nadawkow zmištrować.“ Po słowach financneho měšćanosty šmórnjene dobrowólne wukony komunu njewuchowaja.

Na naprašowanje ze stron radźićelow, kak dale z měšćanskej halu „Króna“, wyši měšćanosta Alexander Ahrens (SPD) rjekny, zo wón k jónu wobzamknjenemu kompromisej steji a zo koronakriza na tym ničo njezměni. Dale wyši měšćanosta měnješe, zo wšelake rozsudy sakskeho knježerstwa, na přikład tón wo rjadowanju nastupajo 800 kwadratnych metrow we wikowanju, zrozumić njemóže. Tajke wobmyslenja wón tež tym kruham dale sposrědkuje, kotrež wo tym rozsudźa. Tam su wězo jara kedźbliwi, přiběrajcy pak ludźo z nohomaj wothłosuja. Zro­zumić njemóže wyši měšćanosta Ahrens tež w socialnych syćach připowědźene ­demonstracije k 1. meji pod hesłom „Zakładny zakoń škitać – přećiwo koronowej swojowólnosći“, přetož swojowólnosć w žanym času přiměrjena njeje.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND