Chětro łoskoćiwy a emocionalny problem měješe wčera Radworska gmejnska rada na swojim prěnim posedźenju z nowej wjesnjanostku na čole na blidźe. Rozrisanje pak je wotwidźomne.
Radwor (SN/MkWj). Informacije, kotrež so minjene dny mjez staršimi šěrjachu, derje njeklinčachu: Z nowym šulskim lětom budźe na Radworskej zakładnej šuli 14 dźěći bjez hortoweho městna, dokelž su wobstejace kapacity wućežene. W najhóršim padźe by šula dźěći, kotrež zwonka Radworskeje gmejny bydla, na přikład w Baćonju abo Smochćicach, wotpokazać dyrbjała. Mjez nimi bychu tež serbske dźěći byli, štož by na škodu serbskeje rjadownje było.