Na terenje bywšeho hosćenca hišće wjele dźěła čaka
Pančicy-Kukow (SN/MWj). Nimojěducy móhł sej myslić, zo je na terenje bywšeho stareho hosćenca w Pančicach-Kukowje wšitko dotwarjene. Bager drje tam hišće je, ale kontury su hižo derje spóznać. Štomy a kerki rosć abo samo hrajkanišćo nastać pak tam dawno hišće móc njebudu. Tule iluziju skóncować dyrbješe wjesnjanosta Markus Kreuz (CDU) na wčerawšim posedźenju gmejnskeje rady we Wotrowskej starej šuli. „Hdźež je stary hosćenc stał, lětsa hišće žadyn perfektny park njebudźe“, wón rjekny.
Hruby profil drje je hotowy, na gmejnu a twarsku firmu pak čaka hišće wjele dźěła. Na terenje dyrbja dalšu worštu pjeršće nasypać. Nimo toho maja puć wutworić a schód twarić. Planowane přepołoženje wotrězka Klóšterskeje wody drje stanje so po słowach Kreuza hakle 2022. Na druhim boku to gmejnje zmóžnja, so na planach wobdźělić a swoje předstawy sobu zapřijeć. Jedyn z přichodnych nadawkow budźe, jednotliwe wysokosće wuměrić, zo móhli porjadny schód twarić, wjesnjanosta wčera zdźěli.
