Robert Hänsel: Kupanske jězory móža přiwšěm strašne być
Budyšin (SN/mwe). „Hižo nětko je wotwidźeć, zo změjemy lětsa wjace kupanskich njezbožow. Štož je so minjene tydźenje při morju a w kupanskich jězorach stało, je katastrofalne“, starosći so Robert Hänsel, předsyda Němskeje towaršnosće za wuchowanje žiwjenja (DLRG) Budyšin ze sydłom we Wownjowje (Oehna) při spjatym jězoru. „Póńdźe-li tak dale, změjemy nastupajo njezboža na a we wodźe jedne z najhóršich lět. Mnozy strašne wodźizny podhódnoćeja a strachi často chutnje njebjeru.“ Tak su po słowach Hänsela wjacori njerozumni minjeny kónc tydźenja při howrjacym wichoru a wulkich žołmach z wakeboardom na Budyskim spjatym jězoru byli. „Mnozy njeběchu tři měsacy prawje sportowali a njejsu tuž hižo prawje fit. Samo my mějachmy sobotu a njedźelu swoju wulku nuzu z našimi motorowymi čołmami.“