Njewšědna ideja zakład towarstwa

štwórtk, 20. awgusta 2020
artikl hódnoćić
(0 )
Pokładnik dumperoweho kluba Siegbert Grutka, předsyda Daniel Ruprecht a wuspěšny jězdźer Křesćan Grutka (wotlěwa)  Foto: Alfons Handrik Pokładnik dumperoweho kluba Siegbert Grutka, předsyda Daniel Ruprecht a wuspěšny jězdźer Křesćan Grutka (wotlěwa) Foto: Alfons Handrik

Nimo wulkich nadregionalnych serbskich­ towarstwow, kotrež su často w medijach prezentne, mamy w dwurěčnej kónčinje njeličomne mjeńše a małe towarstwa, kotrež runje tak pilne­ dźěło wukonjeja, wo nich pak přewjele njezhoniš. W swojej lětnjej seriji­ lětsa tajke aktiwne cyłki před­sta­jamy, dźensa Lejnjanski dumperowy klub (14).

16. měrca 2003 załožichu w Lejnjanskim hosćencu towarstwo „Dumperowy klub Lejno“, kotremuž tehdy sydomadwacećo přistupichu. Spočatki pak leža dale wróćo. Jako trjebaše Zejičan Frank Domš 1995 při twarje swójskeho domu transportne wozydło, sej wot znateho dumper wupožči. Štož bě w NDRskim času trabant na dróhach, bě dumper na twarnišćach. Wot lěta 1958 do 1972 su we Wölkauwje pola ­Lipska tutón małotransporter, wuhotowany z ROBUR-motorom z wukonom 8,5 PS twarili. Zajimawe na jězdźidle je, zo ma prědku dwě kolesy a zady jedne, z kotrymž je šoferojo wodźa. Tak je dumper jara wobrotny, na tamnej stronje pak hrozy strach, zo so lochce zwróći.

W lěće 1999 pytaše Lejnjanski młodźinski klub za wjesny swjedźeń wosebitu atrakciju. Frank Domš měješe ideju, přewjesć wubědźowanje na dumperach. Někotři skeptisce reagowachu, druzy mějachu namjet za dobry. Mjez nimi běštaj Lejnjanski korčmar Rajner Kubica a Křesćan Kral, kotryž je spočatnje sobu jězdźił. Wot lěta 2002 pak bě wón Frankej Domšej njeparujomna zepěra jako mechanikar na wubědźowanišćach.

Při prěnich wubědźowanjach w lěće 2000 zhonichu, zo maja młodostni w Koselitzu pola Großenhaina samsne zajimy. Bórze na to wuhotowachu prěnje němske mišterstwa. Tehdy so Lejnjanscy za swójske towarstwo rozsudźichu. Prěni předsyda bě Frank Domš, po nim někotre lěta Rajner Kubica. Mjeztym steji wosom lět Daniel Ruprecht z Časec na čole cyłka. Jako zaměr sej do swojich wustawkow zapisachu, nic jenož němske mišterstwa organizować, planować a přewjesć, ale tež zachować bywše twarske mašiny a je w zjawnosći předstajić. Dale prócuja so, zachować zhromadnosć wjesneje trójki Lejno-Zejicy-Časecy. Tak zarjaduja za dźěći swjedźenje abo pokazuja so šěrokej zjawnosći na Dnju Saksow.

Zo móhli wubědźowanja a němske mišterstwa přewjesć, dyrbja wězo zakonske předpisy dodźeržeć. Prěnje wubědźowanišćo w Lejnje přepołožichu do Baćonja. Mjeztym hižo tři lěta w Hórkach jězdźa. Kóždolětne němske mišterstwa z wjacorymi běhami su towarstwu z 42 čłonami wobšěrneje organizacije dla wulke wužadanje. Tak maja wšitkim mustwam zaručić optimalne wuměnjenja. Tež ličba startowacych mustwow, kotrež přińdu z Adelsdorfa, Bad Freienwalde, Zwickauwa, Koselitza, Baćonja, Großschirma a delnjołužiskeho Drjowka, je so zwyšiła. Na kóždym wubědźowanju maja přerěznje 700 přihladowarjow. Wšitkim dyrbja zaručić zastaranje a wěstotu. Nimo toho maja dumpery wot DEKRA pruwowane być a jězdźerjo maja w padźe njezboža priwatne zawěsćenje měć.

Hladajo na wuslědki wšitkich wubědźowanjow wot lěta 2003 smě Lejnjanske towarstwo z prawom horde na sebje być. Na čole tabulki steji bywši jězdźer Lejnjanskeho cyłka a mjeztym startowacy za Adelsdorf Frank Domš z 1 041 dypkami. Ale hižo na druhim městnje steji z 985 dypkami městopředsyda Lejnjanskeho towarstwa Filip Kral. Wón je amtěrowacy němski mišter. Křesćan Grutka bě dotal docpěł štyri prěnje, dwě druhej a sydom razow třeće městno. Wón ma cyłkownje 619 dypkow a steji na 4. městnje wot 112 mjenowanych na lisćinje najlěpšich. Hižo jako 18lětny je wón ze swójskim dumperom startował. Alfons Handrik

wozjewjene w: Lokalka

Galerija

dalši wobraz (1)
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND