Nimo wulkich nadregionalnych serbskich towarstwow, kotrež su často w medijach prezentne, mamy w dwurěčnej kónčinje njeličomne mjeńše a małe towarstwa, kotrež runje tak pilne dźěło wukonjeja, wo nich pak přewjele njezhoniš. W swojej lětnjej seriji lětsa tajke aktiwne cyłki předstajamy, dźensa towarstwo Nukničanskeje kapałki (15).
Hižo wjacore lěta je w Nuknicy z rjanej tradiciju, zo zetka so wobstajnje skupinka wobydlerjow, zo bychu so wonka a w zymje pola ludźi doma zhromadnje róžowc modlili. Wjacore razy tam wo móžnosći rozmyslowachu, nańć za modlersku hodźinku so hodźace stajne městno. Před lětomaj zrodźichu ideju, sej we wsy kapałku natwarić, a to w mjeztym njewužiwanej a chětro njenahladnej bywšej gratowni dobrowólneje wohnjoweje wobory. Zaběrajo so z prawniskimi předpisami so bórze za to rozsudźichu, załožić towarstwo Nukničanskeje kapałki. Za předsydu towarstwa, kotremuž přisłuša 14 čłonow, wuzwolichu Romana Nuka. Jeho zastupuje jako městopředsyda Marko Smoła a Regina Brězanowa přewza jako pokładnica financne naležnosće towarstwa.