Płuwace domy přepodali

srjeda, 26. awgusta 2020
artikl hódnoćić
(0 )
W Klětnjanskim přistawje su předwčerawšim prěnje płuwace domy přepodali. Dalše maja tam sćěhować.  Foto: Constanze Knappowa W Klětnjanskim přistawje su předwčerawšim prěnje płuwace domy přepodali. Dalše maja tam sćěhować. Foto: Constanze Knappowa

Bjerwałdski jězor ma nětko nowy wulkoprojekt, kiž móhł turizmej tamnišeje kónčiny přewšo tyć a kiž přinjese zdobom nowy elan za strukturnu změnu we Łužicy.

Hamor (CK/SN). W přitomnosći sakskeho ministerskeho prezidenta Michaela Kretschmera (CDU) je Berlinska firma Floating house GmbH (FHG) předwčerawšim při Bjerwałdskim jězoru swoje prěnje płuwace domy poswjećiła. K dotalnym dźesać so w oktobru štyri a na­lěto 2021 dalše přidruža. Dohromady ma potom při ekstra za to twarjenym mo­sćiku w Klětnjanskim přistawje 26 tajkich domow na wodźe stać. 35 firmow, zwjetša z blišeho regiona, je na tym wobdźělenych. Připrawa změje po dokón­čenju 100 dowolowych łožow, prěnje su hižo přenajate. 20 ludźi budźe přichodnje w zarjadnistwje, za rjedźenje, reparatury a za turistiske zaměry přistajenych. Kaž jednaćel FHG Ulf Sybel rjekny, by so wón wjeselił, by-li w bliskosći hosćenc nastał. A tež pasažěrska łódź na jězoru by „jara wulkotna była“.

Před lětomaj je předewzaćelka k njemu přišła a sej za Klětnjanski přistaw tak mjenowany domowy čołmik přała. Te­hdy Sybel ani njewědźeše, hdźe Hamor leži. Na to nawjaza wón kontakt ke gmejnje, kotraž wot toho časa projekt pod­pěruje. W meji 2019 wotewrěchu mustrowy dom. Po dokónčenju změje FHG 7,8 milionow eurow inwestowanych. To ma Sybel za jasne znamjo za region, wšako­ je „maritimny flair bjez jězbneje dowolnosće“ dźeń a woblubowaniši. 160 płu­wacych domow je FHG wot lěta 1999 w Němskej a Nižozemskej twariła. Wone su přerěznje wjace hač 130 dnjow wob lěto­ wobsadźene.

Za turizm we łužiskej jězorinje je to wosebity dźeń, zwurazni Hamorski wjesnjanosta Achim Junker (CDU). Wón so nadźija, zo płuwace domy dalše inwe­sticije wuwabja, snano tež hosćenc, hotel a pasažěrsku łódź. Jedyn z inwestorow bě cofnył, dokelž běchu jemu z přirodoškitnymi žadanjemi přewjele kamjenjow do pu­ća kładli. Hamor so intensiwnje prócuje, Bjerwałdski jězor z toho wuspinkować, wšako maja w gmejnje dalše móžnosće přirodoškita.

Ministerski prezident Michael Kretsch­mer ma wšitkich, kiž so wo turistiske wuwiće jězora staraja, za pioněrow. Tež z jeho wida je pasažěrska łódź trěbna. By-li wón zašo zapřijaty był, bychu to někak­ zmóžnili. „Sym zwólniwy, wo tym hišće raz rěčeć“, wón přilubi.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND