Gmejny dyrbja wjace wotedawka płaćić, nic pak jenož personala dla
Slepo (CK/SN). 191 eurow na wobydlerja płaći w lěće 2021 zarjadnistwo w gmejnach Slepo, Dźěwin a Trjebin. Jednohłósnje je zhromadny wuběrk, zestajany ze zastupjerjow třoch komunow, na zašłym posedźenju wotedawk wobzamknył.
Slepjanske zarjadniske zjednoćenstwo wobsteji wot 1. januara 1999. Wone wopřija tři gmejny Slepjanskeje wosady, wobstejace ze sydom wsow. Wot čestnohamtskeju wjesnjanostow wjedźenej gmejnje Trjebin a Dźěwin wot toho časa žane swójske zarjadnistwo nimatej. Twarske planowanje, koordinowanje dźěćaceho hladanja, posedźenska słužba k podpěrje gmejnskich radow a dalše nadawki wobstaraja za wšitkich w Slepjanskim zarjadnistwje. Wudawki za to noša tři gmejny we formje wotedawka. A tón wobliča po ličbje wobydlerjow.
