W dwěmaj změnomaj slědźa za kontaktnymi wosobami natyknjenych
Budyšin (SN/at). Koronapandemija ma Budyski wokrjes kruće w horšći. Krajnoradny zarjad pak dźe nětko do ofensiwy a chce ludnosć sensibilizować, zo by swobodu jednotliwca nachwilnje wobmjezowace škitne postajenja přećiwo dalšemu rozpřestrěću wirusa dodźeržała.
Kruh sobudźěłaćerjow strowotniskeho zarjada wot dźensnišeho na wjace hač 300 rozšěrja, je krajny rada Michael Harig (CDU) minjeny pjatk na nowinarskej konferency připowědźił. Spočatk oktobra bě jich 40, minjeny tydźeń 185. Nimo toho je 20 wojakow jednotki z durinskeje Gothy pjatk pomocnu słužbu nastupiło. Woni so tónle tydźeń zadźěłuja a kontakty natyknjenych sobu sćěhuja. Tež zastojnicy swobodneho stata pomhaja.