Čorny Chołmc (SiR/SN). Hnydom cyłu skupinu dobrowólnych pomocnikow witachu minjene dny w Čornochołmčanskim Krabatowym młynje. Tam pobychu wobdźělnicy wotewrjeneje młodźinskeje dźěłarnje Domu Bethesda, kotryž je w nošerstwje Diakonije swj. Měrćina. Hižo w lěću běchu woni při dožiwjenskej šćežce za Krabatowym młynom drjewjany nastroj nastajili, kiž kaž ksylofon funguje. Njedawno pak dyrbjachu zwěsćić, zo běchu tam wandalojo zachadźeli a wšelake dźěle prosće zwutorhali. Tuž su so młodźi ludźo w starobje 15 do 25 lět do dźěła dali a instrument sporjedźeli.