Wojerecy (SiR/SN). Klětu budźe tomu 20 lět, zo přewjeduja we Wojerecach kóždolětnje žiwy adwentny kalender. Štož bě hewak nimale samozrozumliwe, pak bě lětsa wulke prašenje. Hižo něšto měsacow hłowny organizator Torsten Vogel starosćiwje rozmysluje, kajki móhł tajki žiwy kalender w časach koronapandemije wupadać. Pomhało jemu při tym je, zo je z rozmołwow z mnohimi ludźimi nazhonił, kak jara sej wobydlerjo zhromadnosć z druhimi přeja.
Torsten Vogel je sej wěsty, zo je bliskosć tež z wotstawkom móžna. „Sym stajnje znowa začuwał, kak wažna zhromadnosć je, runje nětko“, měni diakon. 54lětny je při prěnim lockdownje ze synom Fritzom často při Serbskej studni na torhošću před Wojerowskej radnicu hudźił. Mnozy jemu tehdy wobkrućichu, zo so z pomocu hudźby z druhimi zwjazani čuja. Tež to bě sobu přičina, zo je Torsten Vogel nowy, pandemiji wotpowědowacy koncept za žiwy adwentny kalender planować započał.
