Poslednje dny stareho a prěnje dny noweho lěta su na mnohich městnach składnosć, na dźěło zašłych měsacow zhladować. Serbske Nowiny rozhladuja so po dwurěčnych komunach, što su tam zdokonjeli.
Bukecy (CS/SN). Přirunujo ze zašłymi lětami su w Bukecach lětsa poměrnje mało do infrastrukturnych naprawow inwestowali. To je po słowach wjesnjanosty Norberta Wolfa (CDU) k tomu přinošowało, zo njeje gmejnski etat hižo w tak napjatym pjenježnym połoženju. Dokelž běchu někotre wulkoprojekty hižo wotzamknjene, koncentrowachu so předewšěm na planowanje přichodnych předewzaćow, a to stajnje z widom, zo za nje tež spěchowanske srědki dóstanu. Přetož, kaž wjesnjanosta Wolf podšmórnje, „bjez spěchowanja scyła ničo móžno njeje“.
