Njewšědny Boži narodk w pawiljonje za hrodom swójby přiwabił
Pěskecy (aha/SN). Koronapandemija drje je nimale wšě zwučenosće změniła, přiwšěm běchu hody za wjele ludźi měrny swjedźeń pokoja a wjesela. Nimale wšitcy so po tym mějachu, zo njemóžachu so kaž hewak swójby po zwučenym wašnju we wjetšich kruhach z přiwuznymi zetkawać. Wosebje młode swójby ze swojimi dźěćimi so hewak patoržicu do wobradźenja wječor w našich cyrkwjach při Božim narodku pomodla a wumóžnika witaja.
To je tež z dawnej tradiciju pola Šwejdźic w Pěskecach. Staršej Michaela a Andreas ze swojimi dźěćimi Pawlom, Jasmin a Sofiju chcyštaj so tež lětsa po tym měć. Tola natykliweje chorosće dla chcyštaj wobeńć zetkanja z wjele ludźimi. Tuž bě jimaj přewšo witana móžnosć sej dojěć do Worklec. Dźiwajo na njewšědnu situaciju měješe tam Towarstwo kapałki Marije maćerje Božeje spomóžnu ideju, wuhotować Boži narodk na městnje, hdźež so natyknjenje miniměruje a tola so skići móžnosć k zhromadnemu modlenju. Za to hodźace městno bě tam pawiljon, bywša oranžerija w hrodowym parku.
