Wojerecy (AK/SN). Łužiski jězorinowy klinikum we Wojerecach hotuje so na digitalny přichod. Spěchowanske srědki za studiju wo projekće „Virtual smart hospital“ we wobjimje 100 000 eurow je sakske ministerstwo za regionalne wuwiće přizwoliło, kaž nowinski rěčnik klinikuma Gernot Schweitzer rozprawja (SN informowachu). Hišće do patoržicy je wopismo dóšło. Za wobdźělenych z regionalneje politiki, z města a klinikuma bě to wulki hodowny dar, Schweitzer podšmórnje. Statny minister Thomas Schmidt (CDU) projekt wot wšeho spočatka znaje. „,Virtual smart hospital‘ móže wažny měznik za dołhodobne strukturne wuwiće města Wojerec a za wuwiće Łužicy na wočerstwjenski a strowotniski region być“, Schmidt wuswětla.