Digitalny debit jolka-swjedźenja jako wuslědk wuspěšneho spjećowanja

Kajka to ironija: Runje zarjadowanje, za kotrež su organizatorojo w minjenych lětach z pokazku „tež lětsa bjez livestreama“ wabili, je so hladajo na ličbu wobdźělnikow z dotal najwuspěšnišim wirtuelnym serbskim swjedźenjom stało. Što tajkale pandemija tola wšitko zamóže ... Hewak so korona w programje 23. jolki pod hesłom „Korutanska – Z korejtu přez dolinu“ nimale njejewješe, wothladajo wot na tři ducenty štučkow wopřijacy spěw Luciana Kaulfürsta, kiž – zastupujo takrjec tradicionalny jolka-chór – ze swójskimi hrónčkami we wobłuku tak mjenowaneho warm-upa zwěsći, zo tuchwilu postajeny radius aktiwitow 15 kilometrow za Łužicu njedosaha.