Społnomócnjene za serbske naležnosće z jasnym pominanjom
Choćebuz/Budyšin (SN/at). Strukturna změna po kóncu zmilinjenja a wudobywanja brunicy je proces, z kotrymž zaběrachu so społnomócnjene za serbske naležnosće města Choćebuza kaž tež dwurěčnych delnjołužiskich a hornjołužiskich wokrjesow na swojim njedawnym wuradźowanju. Wone su zjednoćene w dźěłowym kruhu, kotryž je sej pominał we wobłuku strukturneje změny potenciale komunalneje runiny kaž tež te serbskeho ludu na wšitkich runinach splesć. To zmóžnja „nadhódnotu procesa strukturneje změny za potrěbnosće ludźi na městnje zwyšić“, podšmórnje prěnja rěčnica dźěłoweho kruha a społnomócnjena za naležnosće Serbow města Choćebuza Ana Kosacojc-Kozelowa w nowinskej zdźělence. Hromadźe ze swojimi koleginami w zastojnstwje ma wona za wažne, „zo měli serbsku kajkosć jónkrótnosće we Łužicy wokrjesy a kraje přesahujcy tež we wubědźowanju z tamnymi hórnistwowymi regionami zwjazkoweje republiki hódnoćić“. To płaći runje tak za zakótwjenje serbskeje rěče w procesu digitalizacije.