Budyskej měšćanskej radźe je nowy předsyda dźěłoweho kruha za serbske naležnosće Benjamin Wirth rozprawu dźěławosće podał. Při tym naspomni wón ideje, kiž hodźeli so w přichodźe zwoprawdźić. Njezataji pak tež brachi, kotrež měli so wotstronić.

Budyšin (CS/SN). Benjamin Wirth zwěsći na wčerawšim posedźenju měšćanskeje rady w swojej zamołwitosći jako předsyda dźěłoweho kruha za serbske naležnosće Budyšina, zo so serbske swójby zaso do města nawróćeja. Za přičinu ma wón tudyšu dwurěčnosć a zo je móžno tu žiwu serbskosć dožiwić. „Jako město Budyšin mamy na přikład porno Choćebuzej woprawdźite lěpšiny“, Wirth zwurazni. Jeho zaměr je, zo so dwurěčnosć, kotraž dźě płaći jako pokazka na wosebitosć, samo­zrozumliwa stanje. Jako přikładaj mjenowaše předsyda dźěłoweho kruha hrajkanišćo „Sprejnik“, hdźež měli hišće stelu ze serbskim napisom stajić, kaž tež runoprawne serbsko-němske popisanje no­weje mjećenskeje mašiny Budyskeje wobdźělenskeje a wobhospodarjenskeje towaršnosće.