Zaběrajo so z přichodnym financowanjom dźiwadłow w Zhorjelcu a Žitawje je Zhorjelski wokrjes wobzamknył dźěłowu skupinu wutworić. Ta ma konkretne namjety zdźěłać.
Zhorjelc (AK/SN). Sejmik Zhorjelskeho wokrjesa wuznawa so k tomu, wobstejace struktury za Gerharta Hauptmannowe dźiwadło w Zhorjelcu a Žitawje zachować. Financna wěstota za wobaj domaj ma dołhodobnje zaručena być. Tohodla wutworja dźěłowu skupinu, kotraž konkretne namjety zdźěłuje. Předwidźane je, zo wokrjesny sejmik klětu w aprylu k tomu stejišćo schwali. To su wokrjesni radźićeljo na swojim srjedownym posedźenju při jednym přećiwnym hłosu a jednym hłosawzdaću z wjetšinu wobzamknyli.
