W zwisku z komunalnym dźěłom w městach a gmejnach nastawaja zas a zaso prašenja, čehodla wobsteja wěste rjadowanja, kak je to a tamne zakonsce předpisane a štó ma poprawom kotre prawa. Na tajke a podobne prašenja wotmołwjamy w małej seriji. Naš awtor je bywši wjelelětny předsyda zarjadniskeho zwjazka Při Klóšterskej wodźe Alfons Ryćer. (7)
Gmejnska rada je čestnohamtske politiske zastupnistwo wobydlerstwa a hłowny organ komuny. Wona rozsudźa wo wšěch naležnosćach gmejny, dalokož njejsu po zakonjach wěste nadawki wjesnjanosće přirjadowane. Hač su to hospodarski plan, personalne naležnosće, wobzamknjenje najwšelakorišich wustawkow, přistup k zaměrowym abo zarjadniskim zwjazkam, pěstowarnja, šula, komunalne bydlenja a wjele dalšeho – wšitko maja gmejnscy radźićeljo na swojich zhromadźiznach wobjednać.
