Wojerecy (SiR/SN). Dołhe powjazy pisanych chorhojčkow podłu hasow, móžnosće k posydnjenju a najwšelakoriše zarjadowanja, kotrež k wožiwjenju historiskeho centruma města přinošuja – takle prezentuje so tele dny a hišće hač do 19. septembra pod nawodom cityjoweho managementa lětuši staroměšćanski bulwar we Wojerecach. Koronapandemije dla stawa so to lětsa w trochu mjeńšej formje. Přiwšěm ludźo poskitki na torhošću a na wokolnych hasach rady přiwozmu a so nad nimi wjesela.
Dobry wothłós žněja hižo dlěši čas wulke žołte kwětkowe sudobja, na kotrychž móžeš rozdźělne žiwjenske mudrosće, mjez druhim tež w serbskej rěči, čitać. Nastali su wone hromadźe z přemysłowym kruhom za měšćanski přichod a z marketingowym towarstwom Wojerowski swójbny region.
