Radwor (rz/SN). Spočatk tohole tydźenja je w Radworju horstka ludźi Mikławša Brězana na wandrowstwo rozžohnowała. Po tym zo bě tam młody Serb wjesnu taflu přelězł, přewostajichu jeho swójbni a přećeljo nazhonitemu wandrowskemu.

Poprawom pochadźa Mikławš Brězan z Prawoćic, hdźež bychu jeho tež rozžohnować dyrbjeli. Dokelž pak by to za jeho přewodźerja, tež „starca“ mjenowaneho přeblisko k jeho domiznje było, steješe Prawočanska wjesna tafla póndźelu takrjec w Radworju.

Drastu běchu wandrowscy hižo kónc tydźenja do toho nowačkej přepo­dali. K porjadnemu woblečenju słušeja cholowy, lac a kabat z čorneho korda kaž tež běła košla, tak mjenowany štawtk, čorny kłobuk a zwjerćany kij. Drastu Mikławša Brězana su mjez swójbnymi a přećelemi přesadźowali. Pjenjezy, kotrež tak nazběrachu, ma skupina wandrowskich prěnje dny za zastaranje k dispoziciji.