Busy na skazanku na šulerskimaj linijomaj nadměru derje wužiwane
Budyšin (SN/at). W zjawnym wosobowym bliskowobchadźe (ÖPNV) dyrbi Budyski wokrjes lětsa wjace pjenjez nałožić, hač ma to zaplanowane. Tak je wokrjesny sejmik na njedawnym posedźenju dalše wudawki 622 000 eurow schwalił. Přidatnym wudawkam stejachu tež zalutowanja napřećo, na přikład přez přikrótšene poskitki korony dla.
Z wotstawkom najwjetša přičina su stupace mzdy we wobchadnych předewzaćach, rěka w předłoze wokrjesneho zarjadnistwa. Ale tež wudawki za trěbne polěpšenja wobstejacych poskitkow ÖPNV a za wobšěrniše wužiwanje busow na skazanku (Rufbus) k tomu słušeja.
