Wo móžnosćach, njedźelu w Budyšinje nakupować, je měšćanska rada na swojim posedźenju předwčerawšim wuradźowała. Z wjetšinu hłosow je rozsudźene, zo wostanje najprjedy raz wšitko při starym.
Budyšin (SN/JaW). Wobchody sprjewineho města smědźa tež přichodnje jenož tři njedźele wob lěto wotewrjene měć. To je tudyša měšćanska rada na swojim wuradźowanju srjedu popołdnju po wěcownej diskusiji rozsudźiła. Tak wobkrućichu měšćanscy radźićeljo dotalne rjadowanja nastupajo nakupowanske njedźele.
Kaž Budyski wyši měšćanosta Alexander Ahrens (SPD) informowaše, su naležnosć tež hižo we hłownym wuběrku města rozjimali, hdźež bě wjetšina za rjadowanje, po kotrymž „smědźa wobchady po cyłkownje třoch njedźelach wotewrěć: na Budyskim nalěću kaž tež we wobłuku hodownych wikow 1. a 3. adwenta“, Ahrens rozłoži. Dale rozprawješe wón wo tym, zo je město ze zastupnikami cyrkwje a dźěłarnistwow rěčało. „Woni maja rozdźělenje nakupowanskich njedźelow w Budyšinje za dobre“ a chwalachu sej ofensiwne postupowanje města wo rozmołwu.