Dźensa zhladujetaj w Drěwcach (Driewitz) pola Łaza Günter Wjenk a jeho mandźelska Hilža rodźena Rezikec na 50 lět zhromadneho žiwjenskeho puća. Wobaj staj strowaj a čiłaj. Měještaj rjane dožiwjenja, a wšitke napołožene ćeže staj w přezjednosći přewinyłoj.

Złota jubilarka narodźi so 1951 w Lipiču. W ratarskej swójbje wona z bratrom a sotru wotrosće. Hižo za čas dźěćatstwa je sej kajkosće kaž pilnosć, dypkownosć a porjad přiswojiła a sej je hač do dźensnišeho wobchowała. Wuchodźiwši 10. lětnik Minakałskeje šule poda so 1967 na Serbski wučerski wustaw w Budyšinje. Derje wě so hišće na swojich wučerjow dopomnić, wosebje na Mikławša Krawca, kotrehož sej dźensa hišće waži. Po złoženju statneho eksamena z kwalifikaciju jako wučerka za delni schodźenk wučeše wona šulerjow we Wojerecach a w Delnim Wujězdźe.