Rakecy (WL/SN). Hinak hač pola wampirow, kotrež kobołk scyła rady nimaja, je tale zelenina za čłowjeka wosebje strowa a jemu tyje. Tohodla njezadźiwa wobchodna ideja Andréja Gana a jeho mandźelskeje Antje z Rakec, załožić kobołkowy wobchod. Prěnju ideju měještaj wonaj hižo w lěće 2017. André Gano tykaše na pře­strjeni 200 kwadratnych metrow prěni kobołk. Při swojim planowanju pak njewobkedźbowaše ekstremnu suchotu přichodneho lěta a z njej zwjazanu njenahladnu wulkosć cyblow. Tohodla so mandźelskaj rozsudźištaj, njepředawać cyblki kobołka, ale hotowe kobołkowe wudźěłki.

Swójbni, přećeljo a znaći jimaj při prěnimaj produktomaj pomhachu. Běštej to kobołkowy granulat a kobołkowa sól. Runočasnje nastachu ideje za dalše wudźěłki: wosebje wótra kobołkowa sól a wšelke měšeńcy za grilowane kołbaski, rybu, dźiwinu a dalše, a to wězo wšitko z kobołkom. Kupcy koncept rady přiwzachu, a tak je André Gano plahowansku płoninu na 3 000 kwadratnych metrow powjetšił. Přichodnje chce so na poł hektara zwažić.