Załožba za serbski lud a město Budyšin trěbne zrěčenje podpisałoj

Budyšin (SN/at). Za twar „Serbskeho foruma wědy při Lawskim arealu“ w Budyšinje dyrbi Załožba za serbski lud mějićelka trěbnych štyrjoch ležownosćow mjez Lawskimi hrjebjemi a Hošic hasu być. Prěni krok k tomu bu minjeny pjatk w kencliji tudyšeje notarki Bettiny Sturm sčinjeny. Załožbowy direktor Jan Budar a Katrin Liebig, sobudźěłaćerka w ležownostnym zarjedźe měšćanskeho zarjadnistwa z połnomocu wyšeho měšćanosty Alexandera Ahrensa (SPD), staj kupne zrěčenje podpisałoj. Wone poćahuje so na areal stareje póstownje na Hošic hasy a na susodnu mjeńšu płoninu, tuchwilu za parkowanje wužiwanu. Wobě ležownosći přeńdźetej nětko z wobsydstwa města Budyšina do wobsydstwa Załožby za serbski lud. Kupna płaćizna wučinja 83 044 eurow, kaž Michaela Mošowa, zastupjerka załožboweho direktora, na naprašowanje zdźěli.