Hdyž so lěto nachila, skići so na mnohich městnach składnosć, minjenych dwanaće měsacow bilancować a hladać, što je so zwoprawdźiło. Tež wuhlad ­na nowe lěto je při tym na městnje.

Halštrowska Hola (AK/SN). Lěto 2021 bě za gmejnu Halštrowska Hola dosć intensiwne. Tole wuzběhny wjesnjanosta ­Dietmar Koark (CDU) na njedawnym posedźenju gmejnskeje rady. „Začuće zhromadnosće je pandemije dla poćerpjeło. Zo mamy wokomiknje podobnu situaciju kaž před lětom mje rudźi“, wón rjekny. „Přiwšěm smy jako gmejna wjele zwoprawdźić móhli.“

Koark wjeseli so nad přinoškom swojeje komuny při saněrowanju zakładneje šule w Lubušu, štož podpěrachu ze 600 000 eurami. Klětu přidadźa dalšich 300 000 eurow. „Wěmy, zo maja naše dźěći tam dobre wuměnjenja za wuknjenje“, tak wjesnjanosta. Dźěći z jeho gmejny wuknu tohorunja w Nowej Wsy a we ­Wojerowskej zakładnej šuli „Handrij ­Zejler“.