Minakałski barokny hród je jeho wobsedźer w lětdźesatkach po politiskim přewróće wobšěrnje saněrował. W bywšim konjencu bě sej wón wosebitosć wumyslił.
Minakał (UM/SN). Na nuznik hić tam, hdźež su so tež hižo konje wuznamnych wosobinow wolóželi, móžeš nětko při Minakałskim hrodźe. W přitwarje sewjerneho kawalěrskeho domu je wobsedźer hrodu Hermann Fuchs w minjenych měsacach zawěrno njewšědny pjaty róžk wutworił: nuznik w kawalěrskim konjencu.
„Hdźež bě w lěće 1833 hižo kóń Carla Gustava Carusa zaměstnjeny, skićimy nětko tule komfortabelny a bjezzadźěwkowy zjawny nuznik“, Hermann Fuchs přeprošuje. Hižo stawiznisce inspirěrowane wobswětlenje a kopija wuznamneje rysowanki „Minakałski hród w swětle měsačka“ mjenowaneho wuměłca a lěkarja posrědkujetej mały zaćišć wo času, hdyž bě Carusowy štyrinohaty přewodźer na tymle městnje swój wows žrał. Carl Gustav Carus (1789–1869), přećel hrabinskeje swójby von Einsiedel, bě wjacore razy z jeje hosćom na Minakałskim baroknym hrodźe.
