Wotrowska cyrkej dóstanje přewětrjensku připrawu, elektriku a barbu
Wotrow (SN/MWj). Z poslednjej Božej mšu je Wotrowska wosada minjeny štwórtk ze swojeho Božeho domu wućahnyła. Nazajtra započachu ławki wotšrubować a sobotu su je pomocnicy z cyrkwje znosyli. To bě start wobšěrneho ponowjenja cyrkwje, kotrež ma hač do wosadneho swjedźenja w juniju składnostnje 250. róčnicy wobstaća wosady swj. Bena wotzamknjene być. „Nimo ławkow smy tež wšón dalši mobiliar, kiž je za liturgisku potrjebu trěbny a je transportabelny, wurumowali, mjez druhim tež wołtarne blido. Wone je chětro wobškodźene. Najwjetši dźěl dowjezu do Rjenčec firmy w Dobrošicach, hdźež wšitke drjewjane dźěle po pomnikoškitnych zasadach ponowja a zawěsća“, rozłožuje Chróšćanski farar Měrćin Deleńk, kiž je za Wotrowsku wosadu sobu zamołwity. Dźensa započachu róšty twarić, a to tak, zo je dale móžno w cyrkwi njedźelu kemše swjećić. Za to dyrbja sej wosadni stólc sobu přinjesć. Jeno za seniorow spřihotuja 20 stólcow, tak zo woni žane po wsy nosyć njetrjebaja.