Wola noweho wjesnjanostu

štwórtk, 20. januara 2022
artikl hódnoćić
(0 )
Wot lěta 2015 je Achim Junker Hamorski wjesnjanosta. 12. junija maja wólbokmani wo jeho naslědniku rozsudźić.  Foto: Constanze Knappowa Wot lěta 2015 je Achim Junker Hamorski wjesnjanosta. 12. junija maja wólbokmani wo jeho naslědniku rozsudźić. Foto: Constanze Knappowa

Hamor (CK/SN). Kaž w mnohich druhich gmejnach Zhorjelskeho a Budyskeho wokrjesa dóstanu wólbokmani tež we 18 wjesnych dźělach Hamorskeje gmejny 12. junija k wólbam dwaj hłosowanskej lisćikaj. Woni rozsudźa wo nowym krajnym radźe Zhorjelskeho wo­krjesa a runočasnje wo nowym wjesnjanosće Hamora. Móžny druhi wólbny přechod planuja za 3. julij. To su čłonojo Hamorskeje gmejnskeje rady na swojim zašłym posedźenju jednohłósnje wobzamknyli. Po wuprajenju nawody hłowneho zarjada Ariana Leffsa jedna so wo regularne wólby. Kaž hižo při zašłych wólbach wjesnjanosty před sydom lětami zwjazaja je tež tónraz z wólbami krajneho rady.

Wjesnjanosta Achim Junker (CDU) bě so w juniju 2015 w druhim wólbnym přechodźe ze 46,4 procentami přećiwo Marijej Weierej z Wochoz a Frankej Knoblochej z Delnjeho Wujězda přesadźił. Komunalne dźěło tehdy 55lětnemu cuze njebě. Wuwučeny instalater bě wot lěta 1990 čłon gmejnskeje rady. Hač do 2015 je wón nimo toho sydom lět swojeho předchadnika Rolanda Trunscha zastupował.

wozjewjene w: Lokalka
Prošu přizjewće so, chceće-li komentar podać

nawěšk

nowostki LND