Chróst (KJ/SN). Přewšo tragiske zasadźenje dyrbjachu wohnjowi wobornicy wčera wječor w Chrósće pola Wulkeje Dubrawy zmištrować, hdźež je so bydlenski dom dospołnje wupalił. Jako prěni wobornicy krótko do dźewjećich na Adolfshüttsku dróhu přijědźechu, sapachu hižo płomjenja z třěchi jednoswójbneho domu. Wulke mróčele kura stupachu k njebju, njewšědny smjerd so rozpřestrěwaše.

Wot wobydlerjow njebě ničo widźeć. Tuž so wobornicy z dychanskim škitom do domu předrěchu, zo bychu za ludźimi pytać započeli. Nutřka pak jich wulka překwapjenka wočakowaše. Přizemjo bě hač k woknam połne njerjada, štož pytanje znjemóžni. Nimo toho so płomjenja spěšnje rozpřestrěchu, tak zo wěstota wobornikow hižo zaručena njebě.

Krótko na to dožiwichu zły wokomik. Wobornik zalěze po rěblu hač k woknu prěnjeho poschoda. Rozbiwši wokno wuhlada wón wosobu, kotraž bě w płomjenjach hižo žiwjenje přisadźiła. Wulkeje horcoty dla pak njemóžachu ćěło z domu wućahnyć.