Woheń w bydlenskim domje tragiski wukónc měł

štwórtk, 03. měrca 2022
artikl hódnoćić
(0 )
W tutym domje w Chrósće pola Wulkeje Dubrawy je wčera wječor dotal njeznatych přičin dla woheń wudyrił. Jedna wosoba je tu žiwjenje přisadźiła. Při hašenju bědźachu so wobornicy z wjacorymi problemami.  Foto: Jens Kaczmarek W tutym domje w Chrósće pola Wulkeje Dubrawy je wčera wječor dotal njeznatych přičin dla woheń wudyrił. Jedna wosoba je tu žiwjenje přisadźiła. Při hašenju bědźachu so wobornicy z wjacorymi problemami. Foto: Jens Kaczmarek

Chróst (KJ/SN). Přewšo tragiske zasadźenje dyrbjachu wohnjowi wobornicy wčera wječor w Chrósće pola Wulkeje Dubrawy zmištrować, hdźež je so bydlenski dom dospołnje wupalił. Jako prěni wobornicy krótko do dźewjećich na Adolfshüttsku dróhu přijědźechu, sapachu hižo płomjenja z třěchi jednoswójbneho domu. Wulke mróčele kura stupachu k njebju, njewšědny smjerd so rozpřestrěwaše.

Wot wobydlerjow njebě ničo widźeć. Tuž so wobornicy z dychanskim škitom do domu předrěchu, zo bychu za ludźimi pytać započeli. Nutřka pak jich wulka překwapjenka wočakowaše. Přizemjo bě hač k woknam połne njerjada, štož pytanje znjemóžni. Nimo toho so płomjenja spěšnje rozpřestrěchu, tak zo wěstota wobornikow hižo zaručena njebě.

Krótko na to dožiwichu zły wokomik. Wobornik zalěze po rěblu hač k woknu prěnjeho poschoda. Rozbiwši wokno wuhlada wón wosobu, kotraž bě w płomjenjach hižo žiwjenje přisadźiła. Wulkeje horcoty dla pak njemóžachu ćěło z domu wućahnyć.

wozjewjene w: Lokalka
Prošu přizjewće so, chceće-li komentar podać

słowo lěta 2022

nawěšk

nowostki LND