Alex Theile: „Njebudu prawniski stat w žanym času do prašenja stajeć“
Wojerecy (SN/at). Sobustawojo SPD, Zwjazka 90/Zelenych a Lěwicy w Budyskim wokrjesu běchu sej přezjedni: Alex Theile je jich zhromadny kandidat za wólby Budyskeho krajneho rady 12. junija. Z překwapjacym wuslědkom sto procentow je kóžda z třoch stron namjet swojeho předsydstwa, Kamjenčana za swójskeho požadarja do načolneho komunalneho zastojnstwa wuzwolić, sobotu na separatnym zarjadowanju we Wojerowskej Kulturnej fabrice wobkrućiła.
Alex Theile wupraji swoju solidaritu z ludźimi na Ukrainje, bojacym so wo žiwjenje a přichod. Jim napřećo měli w Budyskim wokrjesu wotewrjeni być. Ruska ludnosć njeje wójnski škarak, tohodla měli wšitkich podpěrać, kotřiž za demokratiju a swobodu na dróhu du.
